Asa lavitr’ezaka iarahan’ny MEDD mifandrimbona amin’ny Minisiteran’ny Fanabeazam-pirenena ny fanamafisana ny fanabeazana ara-tontolo iainana manerana ireo sekoly eto Madagasikara.
Tanjona amin’izany ny hamporisihina ny fandraisana andraikitra sy ny fananana toetra miaro sy mikajy ny tontolo iainana manomboka eny an-tsekoly ka hipaka eo amin’ny isan-tokantrano sy eo anivon’ny fiaraha-monina.
Ny isam-batan’olona no mila mahatsapa fa tompon’antoka voalohany amin’ny fiarovana ny tontolo iainana.
Mpianatra miisa 650 avy ao amin’ny EPP sy LYCEE Fenoarivo Be sy ny sekoly Advantiste Fenoarivo Be no nisitraka fanentanana sy fampianarana ara-tontolo iainana izay notanterahin’ny DIREDD ITASY-BONGOLAVA ny 27 sy 28 aprily 2022 teo. Ny fampivelarana ny maha-olona, ny maha zava-dehibe ny fambolen-kazo sy ny fanaraha-maso ireo hazo novolena ary ny ady amin’ny doro tanety no nanentanana ireto mpianatra ireto.
Tafiditra indrindra ao anatin’ny paikadin’ny MEDD amin’ny fampiharana ny fanabeazana ara-tontolo iainana isan-tsekoly no sady fampandraisana andraikitra ny mpianatra sy ny Ray aman-dreny amin’ny fikajiana ny tontolo iainana izao asa izao.