Fambolen-kazo tamin’ny velaran-tany 20ha izay notanterahina tao amin’ny kaominina Ankaramena no nanamarihana ny « Andro iraisam-pirenena ho an’ny ala » tao amin’ny Faritra Anôsy. Narahana fanentanana mahakasika ny fikajiana ny tontolo iainana, ny ady amin’ny doro ala sy ny doro tanety ary ny ady amin’ny fiovan’ny toetrandro ity hetsika ity izay notarihan’ireo tompon’andraiki-panjakana isan-tsokajiny eo anivon’ny Faritra sy ny mponina ao Ankaramena.
Nohamafisina nandritra ity fambolen-kazo ity ny fanentanana ny rehetra amin’ny tsy maintsy anaovana laharam-pahamehana ny fanaraha-maso ireo zanakazo ireo hiantohana ny fahaveloman’izy ireo.
