🌿𝗙𝗮𝗻𝗼𝗺𝗯𝗼𝗵𝗮𝗻𝗮 𝗻𝘆 𝗳𝗮𝗺𝗯𝗼𝗹𝗲𝗻-𝗸𝗮𝘇𝗼 : 𝗙𝗮𝗿𝗶𝘁𝗿𝗮 𝗔𝘁𝘀𝗶𝗺𝗼 𝗔𝗻𝗱𝗿𝗲𝗳𝗮𝗻𝗮🌱

“ 𝗜𝘇𝗮𝘆 𝗺𝗮𝗺𝗯𝗼𝗹𝘆 𝗵𝗮𝘇𝗼, 𝗺𝗮𝗻𝗼𝗺𝗲 𝗮𝗶𝗻𝗮 ”

Tao amin’ny endritanin’i 𝗕𝗮𝘀 𝗠𝗮𝗻𝗴𝗼𝗸𝘆 ao #Antsakoabe – kaominina 𝗧𝗮𝗻𝗮𝗻𝗱𝗮𝘃𝗮 𝗦𝘁𝗮𝘁𝗶𝗼𝗻 no nanombohana ny taom-pambolen-kazo teo anivon’ny Faritra Atsimo Andrefana ny 23 janoary 2026 izay teo ambany fitarihan’ny 𝗗𝗥𝗘𝗗𝗗 𝗔𝘁𝘀𝗶𝗺𝗼 𝗔𝗻𝗱𝗿𝗲𝗳𝗮𝗻𝗮 ary ny notronin’ny Lehiben’ny Faritra, ny avy eo anivon’ny Prefektiora ary ny tompon’andraiki-panjakana maro eo anivon’ny faritra, ny mpiara-miombon’antoka, olon-tsotra sy fikambanana maro samihafa.

𝗙𝗮𝗻𝗮𝗿𝗲𝗻𝗮𝗻𝗮 𝗮𝗹𝗮 𝗺𝗶𝗿𝗲𝗳𝘆 𝟮𝟱 𝗵𝗮 tao amin’ny 𝗖𝗼𝗺𝗽𝗹𝗲𝘅 𝗠𝗮𝗻𝗴𝗼𝗸𝘆 𝗜𝗵𝗼𝘁𝗿𝘆 no notanterahina tamin’izany izay nahafaha namboly 𝘇𝗮𝗻𝗮𝗸𝗮𝘇𝗼 𝗺𝗶𝗶𝘀𝗮 𝟮𝟱 𝟬𝟬𝟬. Nandray anjara feno amin’ity fambolen-kazo ity ny vondron’olona eny ifotony izay efa mahatsapa tanteraka fa ny fanarenana ny ala sy ny endritany ihany no vahaolana maharitra amin’ny fiharian’izy ireo sy ny velontenany izay miankina amin’ny fambolena sy ny fiompiana.

Nandritra ity fotoana ity dia nisy ny 𝗳𝗮𝗻𝗼𝗹𝗼𝗿𝗮𝗻𝗮 𝗳𝗶𝘁𝗮𝗼𝘃𝗮𝗺-𝗽𝗮𝗺𝗼𝗸𝗮𝗿𝗮𝗻𝗮 maro isan-karazany avy amin’ny 𝗧𝗲𝘁𝗶𝗸𝗮𝘀𝗮 𝗧𝗘𝗙𝗜𝗔𝗟𝗔, izay iarahan’ny 𝗠𝗶𝗻𝗶𝘀𝗶𝘁𝗲𝗿𝗮𝗻’𝗻𝘆 𝗧𝗼𝗻𝘁𝗼𝗹𝗼 𝗶𝗮𝗶𝗻𝗮𝗻𝗮 𝘀𝘆 𝗻𝘆 𝗙𝗮𝗻𝗱𝗿𝗼𝘀𝗼𝗮𝗻𝗮 𝗟𝗼𝘃𝗮𝗶𝗻𝗷𝗮𝗳𝘆 (#𝗠𝗘𝗗𝗗) sy ny 𝗠𝗶𝗻𝗶𝘀𝗶𝘁𝗲𝗿𝗮𝗻’𝗻𝘆 𝗙𝗮𝗺𝗯𝗼𝗹𝗲𝗻𝗮 𝘀𝘆 𝗻𝘆 𝗙𝗶𝗼𝗺𝗽𝗶𝗮𝗻𝗮 (#𝗠𝗜𝗡𝗔𝗘), ho fanohanana ireo tantsaha amin’ny fampiroboroboana ny fambolean’izy ireo sy ny fikarakarana ny zanakazo :

Ambioka vary 6 taonina, ambioka legioma 8 taonina, kits de matériels agricoles motorisés, fitaovana fanodinam-bokatra miisa 816, fitaovana fampiroboroboana ny rohim-pihariana miisa 1 244, zanatrondro miisa 20 000.